کَم‌کَم رِزیا آخَر اسفند وا و اماهم حساب کتاب مُواَواکه که دگه از چندم نِواعُم مدرسه! معَلِمیا هم حِساب کار خوشو شُواَواکه و قبل از ای که مرغ از تله بِگروزِه، تا شُوشَس درس و مشک وتکلیف وکار عملی شُودَس اَدزُم…
ام رِزَه زنگ آخر ادبیات مُوا! خانم جعفرزادهمعلم ادبیاتمو اِز چَن رز قبل اُشگُتِسو یَک تکلیف مهم و خَشی بر عید مِزبَر درنظر گِرِتِسی…اماعم دلخور وجوخور که نام شَوِه چه مُوبِگه! چه کَری مودَس آدِت!
بالاخره وَ ساعت آخر رَسِزُم و وختِه درسش تَمو اُشواکِه، نوبت توضیح تکلیف وا…اول سوال اُشکه کِیا تک کلاس گراشی نیسِن؟ تا یَک تَکلیفِدو شُز بَر در نظر بِگِرُم مَز ای تکلیفه فقط بر بِچیا گراشی تعریف بُزِن! اما هم دِلمو لِه تَوَه سرد و گرم آسو که بِشُم چه آشی شِز بَر نَک کِردِسوم!
یَک ماژیک آبینی اُشواسِه و چو شِه لِه تخته نوشت:«یافتن پنجاه کلمه اصیل گراشی به همراه معنای کامل وشیوه تلفظ به لاتین؛ طبق حروف اختصاص یافته به هرفرد!»
خاب کِسمت اول تکلیف خَشا آسونا… کلمات اصیل گراشی پُرِن! وله اَمی چِه‌ای که کار سخت شَواکه قسمت دومش وا…«طبق حروف اختصاص یافته به هر فرد» اَمَه دِلشو ونَک‌نَک وا که اگه یک کلمه سختی شوگیر اونت چه بکنن؟ اگه«چ» شوگیر اونت چه؟ اگه «ف»؟ غ؟!
خانم جعفرزاده اِز بَرا دفتر کلاسی شَواخَد وبه ترتیب شِه هرکسی یَک حرفی اَدا. شکر خدا ماخو حرف آسونی میگیر اُونت: «ک»… هرچی خوش کلمه اصیل اُوشه هرچی ام‌خومو از ق تبدیل شَه ک اَکنُم…به هرحال جزو معدود دَفَیایی وا که شانس مَعو!
تا لیست تَمو وابی؛ کلاس چو لِه هوا! هرسَری یَک صَدایی شَکِه…
یَکته کلمیا کدیمی که نَمبَبَه شو استفاده شَکِردن شَواخَد، یکته تِف خوش مُرُنگ‌مُرُنگ شَکِه که پنجاه تا کلمه کدیمی گراشی اصیل کِه با یَک حرفی شروع بِبِه از کو بیارُم؟! یکته هم عَلاجی اُشنِوا سِرِ خُو بِزِت کِه ای چه شانسی‌ان ما اومِه؟! چه حرف کمیابی‌ان که گیر ما اُونت؟
وَلِه اِز همه زِرِنگ‌تر یَکتَه اِز بِچیا وا که تِک کُنج اُزاسو وغَپ‌غَپ اَرچی خوش شَیاد زاونت یا اَنَدو بچیا شُوَگُت، شَنِوِشت تا تکلیفُش شَه جُلاو اوبی…
خدایی حرف آسونی هم شیگیر اونتِسو:«خ»! اَمی تا سِرکلاس زونوم پنجاه تاش اُشنِوشت و چو!
آلا که بعد از بوری وخت وَیاد اَمی رِزَه آوَسَم و ای مَتنِ اُمنِوِشت، بَد نی چندتا از کلمه‌یا ناب که بچیا شُواجُسِسو هم آخر کار بِنویسَم. اگه معنیش تونادَنِس، پیشنهاد اَکنَم که خوتو پُرس وسوال بِکنی تا اِز تَوَلای اَمی کلمهِ، چَندتا کلمه وعبارت دِگَه هم یاد بِگِری! اگر کامل معنی همه‌اش تُودَنِس هم اِز پشت ای تریبون تبریک عرض اَکنَم! شما یَک اچمی زبون واقعی اِسِسی!
اُوروسی_ کاچَه _ عَکَرَه _ سَکراو _ طَلبونی _ ریچِرَه دراز _ چَکال _ بِریخ _ کَشمَه _ دَسمِرا _ مِلاز _ زارگ _ تُوَت _ فوکَه _ ایمَلَکِه _ اَوُشتَه _ تِی‌تَخ_ مَلَسَندی_ نَچُک _ خَرس
